NALASOG ang katawan ng isang negosyante makaraang maipit sa loob ng sinasakyang luxury vehicle nang sumalpok sa isang concrete barrier sa Katipunan flyover sa Loyola heights Quezon City, ayon sa naantalang ulat kahapon ng QCPD, Traffic Enforcement Unit.
Namatay habang isinusugod sa Quirino Memorial Medical Center ang biktima na kinilalang si Jose Alvarez, 45, ng No. 1 McKinley Parkway, Taguig City.
Batay sa ulat ni Senior Insp. Erlito Renegin, ng Quezon City Police District Traffic Enforcement Unit, nangyari ang aksidente sa southbound lane ng Katipunan Ave., malapit sa panulukan ng Xavierville Ave., pasado alas-11:45 Huwebes ng gabi, Agosto 29.
Ayon sa ulat, minamaneho ni Alvarez ang isang bagong BMW sedan na may plakang TQA 973 pauwi galing sa kanyang trabaho.
Ayon kay Renegin, maaaring dala ng sobrang pagod sa trabaho ay naidlip ang biktima sa kanyang manibela kung kaya walang kamalayang bumangga siya sa isang kongkretong barrier.
Wala umanong indikasyon na nakainom ng alak ang biktima sa ginawang pagsusuri ng medico legal at malabo, aniyang, mechanical problem ang dahilan sa bagong sasakyan.
The post Kotse sumalpok sa concrete barrier, 1 patay appeared first on Remate.