NASAKOTE ang isang lalaki matapos inguso ng pinagbentahan ng nakaw na motorsiklo sa Valenzuela City Huwebes ng umaga, Mayo 23.
Sa ulat, dakong alas-7 ng umaga nang madakip si Donato Abrigo, 32 sa kanilang bahay sa San Agustin Village, Mapulang Lupa ng lungsod.
Lumalabas na ibinenta ng suspek ang Kawasaki Barako na walang plaka kay Jose Avenido ng Alaminos, Laguna sa halagang P43,000 noong Mayo 16, 2013.
Nagberipika si Avenido hanggang sa malaman na nakaw ang motorsiklo na naging dahilan upang isuko sa mga pulis Laguna at magsagawa ng follow-up operation.
Nakipagtulungan ang mga Laguna Police sa Valenzuela City Police at tinungo ang bahay ng suspek at dinakip.
Lumalabas na ang motorsiklo ay pag-aari ng isang Rodindo Chung at nawala noong Abril 16, 2013 habang nakaparada sa Bagbaguin ng lungsod.
Inaalam na kung miyembro ng carnapping syndicate ang suspek.