NAKAHANDANG isakripisyo ni Pangulong Rodrigo Roa Duterte ang P70-bilyong kikitain ng gobyerno sa minahan para lamang manatili si Sec. Gina Lopez sa DENR.

Sa naging talumpati ni Pangulong Duterte sa inagurasyon ng PTV Cordillera Hub Romulo Drive, Lualhati Compound sa Baguio City, matapos pasinayaan ang bagong PTV Cordillera hub sa lungsod na ito, sinabi ng pangulo na, “We can live without it. I would rather follow Gina. Maghanapbuhay na lang tayo ng iba, get the P70-billion somewhere else and preserve the environment. ‘Wag na tayong magbolahan.”

“The problem is nakita ko ang kalbo until now, malayo na iyang binutas ninyo diyan because it’s an open pit. Pagka ganoon, I have to support Lopez. And I cannot help you. Let me just add that all you contribute to the country is about P70-billion in taxes. We can live without it,” giit pa ng pangulo.

Nangangako rin siyang tutulungan ng gobyerno ang mawawalan ng trabaho sa mining industry sakaling tuluyang ipasara ang mga ito.

“If you have something in mind about Gina Lopez, kindly rethink. Look at her passion,” ani Duterte.

Sa ambush interview, nilinaw nitong walang intensyon ang gobyerno na ipasara ang minahan dahil may batas na pinapayagan ito. KRIS JOSE

SELANGOR- Nalagas sa simpleng pagjo-jogging ang isang mag-asawa matapos tamaan ng kidlat sa Malaysia nitong Linggo ng gabi.

Ang bangkay ng biktimang sina Yee Boon Koo, 59, at Madam Ooi Lee Chen, 57, ay kapwa natagpuang nakahandusay sa mismong jogging lane.

Sa ulat ng New Straits Times, naganap ang insidente dakong 6:45 p.m. sa loob ng isag parke sa Jalan Kenari, Puchong Jaya.

Ayon sa isang nakasaksi, nakarinig siya na may sumigaw bago natagpuan ang mag-asawang nakabulagta sa lupa.

Hindi aniya umuulan nang mangyari ang pagkidlat.

Nakita rin ang payong na gamit ng mag-asawa na may marka ng pagkasunog. BOBBY TICZON

NAKUWELYUHAN ng pulisya ang lalaking nagtutulak ng droga sa mga konduktor at drayber ng bus sa Cubao, Quezon City nitong Linggo ng gabi.

Hindi na nakapalag pa at sumuko agad sa mga operatiba ang suspek na si Tomas Batong, ng 15th St. at P. Tuazon Ave. sa Brgy. San Roque, Murphy, Cubao.

Huli rin sa operasyon ng Quezon City Police District Station 7 ang dalawa pang kalalakihang naaktuhang humihithit ng shabu sa bahay ni Batong na sina John Oroso at Erwin Novilla.

Ayon sa pulisya, customer ni Batong sa kanyang bahay ang mga drayber at konduktor ng mga pampasaherong bus na nakatambay sa Cubao area.

Si Novilla ay isang barker at umano’y tagahatid ng mga customer sa bahay ni Batong.

Itinanggi naman ng tatlong suspek ang paratang ng mga pulis.

Nakumpiska kay Patong ang 30 gramo ng shabu na may street value na P70,000 at isang hindi lisensyadong baril.

Sa kabila ng pagtanggi, hindi naman maipaliwanag ni Batong kung kanino ang mga nadiskubreng shabu sa kanyang bahay.

Inihahanda na ang mga kasong paglabag sa Dangerous Drugs Act of 2002 laban sa tatlong suspek. Sasampahan din ng kasong illegal possession of firearms si Batong. BOBBY TICZON

NASA 10,000 trabaho pa ang bakante.

Ito ay batay sa intenet-based job and applicant matching portal ng Department of Labor and Employment (DOLE) na Philjobnet.

Ayon sa DOLE, pinakamalaking bilang ng mga bakanteng trabaho ay mula sa BPO o Business Process Outsourcing (BPO).

Kabilang sa mga hinahanap ay libu-libong call center agents at daan-daang customer service assistant.

Maliban dito, maraming trabaho din ang naghihintay para sa mga service crew, nurse, production machine operator, promo sales person at marami pang iba.

Hinikayat naman ni Labor Sec. Silvestre Bello III ang publiko na gamitin ang philjobnet sa kanilang paghahanap ng trabaho. JOHNNY ARASGA

NAKAAMBA na naman ang bawas-presyo sa presyo ng mga produktong petrolyo sa susunod na linggo.

Ayon sa source oil industry, maglalaro sa P0.25 hanggang P0.50 ang posibleng i-rollback sa presyo ng kada litro ng gasolina at diesel.

Nito lamang Martes ay nagpatupad ng rollback ang mga kumpanya ng langis bunsod na rin ng paggalaw ng presyo nito sa pandaigdigang merkado. JOHNNY ARASGA

MAKANGINGITI na nang maayos ang mga batang may “bingot” o cleft clip at cleft palate dahil nakatakda silang ipagamot ni Manila Mayor Joseph Estrada.

Ayon kay Estrada, sa tulong ng isang non-government organization, maooperahan na ang mga bata na may biyak sa labi.

Nitong Pebrero 24, pumirma si Estrada ng memorandum of agreement kasama ang Operation Smile Philippines (OSP) para sa gagawing “Gift of Smiles” program ngayong taon na naglalayong tulungan ang mga may bingot o harelip sa lungsod.

“Binibigyan natin ng atensyon ang ating mga kabataang may ganitong kapansanan. Nais nating magkaroon sila ng tiwala sa sarili upang gayo’y lumaki silang mga responsable at produktibong mamamayan,” ani Estrada.

Sa ilalim ng kasunduan, ang OSP, sa pakikipagtulungan ng mga volunteer doctors at iba pang medical professionals, ay magsasagawa ng libreng screening, surgery, at post-surgery care sa mga pasyenteng ire-refer ng Manila Health Department (MHD).

Ang OSP ay local affiliate ng Operation Smile International (OSI), isang volunteer-based medical charity na nagsasagawa ng libreng operasyon sa mga may bingot at iba pang facial deformities sa iba’t ibang bansa mula noong 1982. Nakabase ito sa Virginia, US.

Isasagawa ng OSP ang reconstructive surgeries sa Manila Cleft Care Center (MCCC) sa Sta. Ana Hospital na pinapatakbo ng pamahalaang lungsod.

Ang MCCC ay isang treatment and surgery center para sa mga batang may cleft lip at cleft palate.

Ayon kay MHD chief Dr. Benjamin Yson, nakapag-refer na sila ng mga batang Manilenyo na may cleft lip at palate sa MCCC.

“Our participation, since we are community-based, is to really look for patients with harelip, so ‘yun pa ang pinapahanap ng Operation Smile,” ani Yson.

Isang seryosong kondisyon aniya ang kapansanang ito, lalo na sa mga bata, dahil nakakaapekto ito sa brain and speech development, bukod pa sa mga kumplikasyon tulad ng aspiration pneumonia, bronchitis at problema sa pandinig.

“If you don’t hear well, if you don’t speak well and your confidence is in a very low level, then somehow it affects brain and personality development,” pagdidiin ni Yson.

“All these treatment and surgeries are free. In our hospital, libre po ang doktor, ang gamot, lahat,” ayon pa sa hepe ng MHD. “It’s a holistic program, meaning from looking from them in the communities to bringing them to the hospitals up to complete rehabilitation.”

Ayon sa Department of Health (DOH), isa sa bawat 500 sanggol ang sinisilang na cleft-defective; umaabot naman sa 5,000 bagong kaso nito ang naitatala kada taon. JOCELYN TABANGCURA-DOMENDEN

IPAGBABAWAL na ang mga softdrinks at energy drinks sa lahat ng mga pampublikong at pampribadong paaralan sa bansa.

Ito’y kung maisasabatas ang House Bill 4039 ni 1-Ang Edukasyon Party-list Rep. Salvador Belaro na naglalayong ipagbawal ang lahat ng uri ng softdrinks at energy drinks sa mahigit 46,000 mga public schools.

“Now that softdrinks are sold very cheap, no wonder it becomes the drink of choice of students during recess time. E para na silang kumakain ng tasa-tasang asukal sa sobrang tamis nitong mga softdrinks na ‘to,” ani Belaro.

Nakasaad sa panukalang “Healthy Drinks in Public Schools Act” na maisaayos ang diet at kalusugan ng may 21-milyong mga mag-aaral sa mga pampublikong paaralan.

Giit ni Belaro, kung hindi man tuwirang maipagbawal ay ma-regulate man lamang ang pagtitinda ng ganitong uri ng inumin sa mga school canteens.

Binanggit din ng kongresista sa panukala ang report ng World Health Organization (WHO)noong 2016 kung saan natukoy na mga softdrinks at energy drinks ang pangunahing nagiging sanhi ng pagiging obese at diabetic ng isang tao.

Ayon sa datus ng WHO, ang isang lata ng softdrinks na may 40 gramo ng free sugars ay katumbas ng 10 kutsara ng asukal na mas mataas kumpara sa normal na sugar intake ng katawan kada araw na dapat ay mas mababa sa limang porsyento lamang o anim na kutsara lamang para sa mga adult.

Isinulong din ng mambabatas sa kanyang panukala ang pagbabawal ng softdrinks at energy drinks sa mga private schools. MELIZA MALUNTAG

NASUNOG ang isang bahagi ng Trinoma mall matapos magbuga ng makapal na usok sa stock room ng mall sa EDSA, Quezon City kaninang hapon, Marso 13, Lunes.

Sa ulat ng Bureau of Fire Protection (BFP) ng Quezon City, nagsimula ang sunog dakong 2:40 sa nasabing bahagi ng mall malapit sa MRT North Avenue station.

Dito ay bigla na lamang may lumabas na makapal na usok sa stock room ng mall dahilan para magsilabasan ang mga tao.

Idineklara sa second alarm ang naturang sunog na agad namang naapula ng mga bumbero.

Nabatid na ang stock room ng mall ay pinaglalagyan ng mga appliances ng naturang mall. SANTI CELARIO

GINAHASA ng kapwa estudyante ang isang college student matapos itong lasingin sa loob ng dormitoryong tinutuluyan niya sa Intramuros, Maynila.

Dumulog sa tanggapan ng Women and Children’s Protection Unit ng Manila Police District (MPD)-Station 5 ang 18-anyos na biktima at second-year college student ng Lyceum Univeristy of the Philippines (LPU), kasama ang kanyang ina upang ireklamo ang panggagahasa.

Naaresto naman at na-inquest na sa kasong rape (RA 8353) ang 19-anyos na suspek at second-year college student din sa nasabing unibersidad na si Glendon Fernando.

Sa ulat ni P/Supt. Emerey Abating, station commander ng Manila Police District (MPD)-Station 5, dakong 10:00 ng gabi nang maganap ang panghahalay sa loob ng dormitoryo ng suspek sa Sta. Potenciana St., Intramuros.

Bago ito, inimbitahan ng suspek ang biktima sa kanilang dormitoryo upang uminom ng alak na pinaunlakan naman nito.

Nang malasing na ang biktima ay saka isinagawa ng suspek ang panghahalay.

Pagkauwi ay agad namang nagsumbong ang biktima sa kanyang ina at agad siyang sinamahan sa himpilan ng pulisya upang magreklamo na nagresulta sa pagkakadakip ng suspek. JOCELYN TABANGCURA-DOMENDEN

KINASTIGO ng National Press Club (NPC) ang pagpatay sa isang mamamayahag sa lalawigan ng Masbate.

Sa kanyang pahayag, sinabi ni NPC President Paul Gutierrez na nakikipag-ugnayan na sila sa tanggapan ng Presidential Task Force on Media Security (PTFoMS) para sa kaukulang imbestigasyon sa nasabing kaso.

Sinabi naman ni Presidential Task Force on Violence against Media Workers Executive Director Joel Sy Egco na dati nang nakipag-ugnayan sa kanya si Briones sa kagustuhang maging bahagi ng nasabing tanggapan para sa proteksyon ng mga mamamahayag sa bansa.

Sa ulat, binaril ng riding-in-tandem kahapon ng 8:45 ng umaga sa bayan ng Milagros, Masbate ang biktimang si Joaquin “Jun” Briones na kolumnista ng Remate tabloid at dating publisher ng Masbate Tribune.

Si Briones ay binaril ng mga hindi kilalang suspek malapit sa Bombon Bridge sa Brgy. Bacolod sa nasabing bayan ayon sa paunang impormasyon na nakuha ng NPC kay C/Insp. Malu Calubaquib na siyang hepe sa nasabing bayan. KRIS JOSE

SA ikalawang magkasunod na linggo, muling magpapatupad ng rollback ang mga kumpanya ng langis sa presyo ng kanilang mga produkto simula ngayong araw, March 14.

Sa kanilang anunsyo, magkakaltas ng P0.35 sa halaga ng kada litro ng gasolina, at P0.60 naman sa kada litro ng diesel ang Unioil, Eastern, Jetti, Petron, SeaOil, Phoenix, PTT, Shell at Total simula alas-6:00 ng umaga.

Magkakaroon din ng bawas na P0.70 sa presyo ng kada litro ng kerosene ang Petron, Shell, at SeaOil.

Gayundin ang halaga ng rollback sa presyo ng gasolina, diesel at kerosene ng kumpanyang Flying V na nauna nang magpatupad simula kaninang 12:01 ng hatinggabi. JOHNNY ARASGA

IBINASURA ng Court of Appeals (CA) ang hirit si Sen. Leila de Lima na temporary restraining order (TRO) kaugnay sa pagdinig ng Department of Justice (DOJ) sa ikalawang kaso ng iligal na droga na inihain laban dito.

May kinalaman ito sa operasyon ng self-confessed drug distributor sa eastern Visayas na si Kerwin Espinosa.

Sa 4-pahinang resolusyon na may petsang Pebrero 28, 2017 at isinulat ni Associate Justice Nina Antonio Valenzuela, ibinasura nito ang hirit na TRO ni De Lima na pipigil sa imbestigasyon ng DOJ.

Sinabi ni Valenzuela na nabigo ang lady senator na magprisinta ng ebidensiya na siya ay nakakaranas ng “irreparable injury” kapag hindi napigilan ang pag-aksiyon ng DOJ sa kaso.

Dahil dito, binigyan ng appellate court si De Lima ng 10 araw para magsumite ng kanyang tugon.

Una nang ibinasura ng panel of prosecutors ang reklamong inihain ng National Bureau of Investigation (NBI) dahil sa pag-amin ni Espinosa na nagbigay siya ng P8-million kay De Lima na ginamit sa kanyang kampanya noong May 2016 elections.

Pati ang hirit na TRO ni De Lima na pipigil din sana sa preliminary investigation ng DOJ kaugnay naman ng pagkakasangkot umano niya sa operasyon ng drug trade sa New Bilibid Prisons (NBP) ay ibinasura na rin ng CA.

Pero nananatili pa rin umanong buhay ang reklamo dahil sumasailalim pa ito sa automatic review ng DoJ. BOBBY TICZON

ISANG college professor ang laslas ang leeg at nang buhay ang natagpuan sa Marikina City.

Sinabi ni Marikina police chief S/Supt. Lorenzo Holanday, nadiskubre ang bangkay ng biktimang si Alfredo Dimaano, 44, dating vice president ng Pamantasang Lungsod ng Marikina at nagtuturo ngayon sa ilang kolehiyo sa Metro Manila ng kanilang kapitbahay na ayaw magpabanggit ng pangalan.

Blangko pa ang pulisya kung sino ang salarin pero isa sa kanilang tinututukan ngayong may kagagawan ng krimen ay ang lalaking bisita ng biktima.

Sa ulat, nadiskubre ang bangkay dakong 7:45 a.m. sa loob ng bahay nito sa Marikit Subd., Brgy. Concepcion I.

Ayon kay Kapitan Herardo Sto. Domingo, huling nakitang buhay si Dimaano nitong Martes ng gabi habang na papasok sa kanyang bahay kasama ang isang hindi nakikilalang lalaki.

Sa pag-iimbestiga ng pulisya, nawawala ang laptop, cellphone, pera at iba pang gamit ng biktima.

Teyorya ng pulisya na maaring may pinagtalunan ang dalawa kaya bilang ganti ay nilaslas ng suspek ang leeg ng biktima. BOBBY TICZON

NAARESTO ng mga tauhan ng barangay ang isang 16-anyos na lalaking sinasabing nanghalay sa kanyang 11-taong gulang na sa kanilang bahay kagabi, March 14, sa Malabon City.

Si Pedro (hindi tunay na pangalan), isang out-of-school youth, ay dinala ng mga tanod ng Brgy. Tañong sa Malabon Women and Children’s Protection Desk (WCPD) matapos maaresto dahil sa reklamo ng kanilang nakatatandang kapatid na babae.

Ayon kay PO3 Romirosa Mallari ng Malabon WCPD, pasado alas-10:00 kagabi, Martes, nang maganap ang panghahalay sa biktima.

Natuklasan lamang ang insidente ng nakatatanda nilang kapatid matapos nitong dumaing ng sakit sa kanyang ari.

Nang tanungin ang biktimang si Carol, ‘di tunay na pangalan, ng kanyang ate kung anong nangyari ay ipinagtapat nitong pinagsamantalahan siya ng kanyang kuya Pedro.

Dahil isang menor-de-edad ang suspek, pansamantala muna itong mamamalagi sa pangangalaga ng Department of Social Welfare and Development (DSWD) habang hindi pa dumadating sa tamang edad na saklaw ng saligang batas. ROGER PANIZAL

UMABOT na sa pito ang nalagas habang 1,500 nanaman ang naitalang kaso ng dengue sa buong lalawigan ng Cebu mula Enero hanggang sa kasalukuyan.

Sa datos ng Provincial Health Office, lima ang namatay noong Enero habang may naitalang 729 na kaso ng dengue noong Enero at 648 noong Pebreo.

Ngayong buwan ng Marso, nasa 123 naman ang naiulat na nagkaroon ng dengue sa unang dalawang linggo.

Ayon kay Provincial Epidemiology and Surveillance Unit (PESU) Officer Cyril Pangatungan, kung pagbabasehan ang naitalang kaso ay bumaba ito sa probinsiya ng Cebu pero kailangan pa rin ang pag-iingat.

Nangunguna ang may pinakamataas na kaso ng dengue sa Consolacion, hilagang bahagi ng Cebu na may 170 kaso, Talisay na may 115 na kaso, Toledo City na may kabuuang 112 na kaso, pang-apat naman ang bayan ng Danao na may 91 kaso at ang bayan ng Carcar na may 88 na kaso ng dengue.

Panawagan ng Department of Health (DoH) sa Cebu na ugaliing maglinis at higit sa lahat kung may sintomas sa dengue ay huwag itong balewalain at kaagad dalhin ang pasyente sa ospital. BOBBY TICZON

INIUTOS na ng Department of Health (DoH) ang pagkakaroon ng permanenteng doktor at medical staff sa lahat ng pagamutan ng pamahalaan sa buong bansa.

Ang kautusan ay inilabas noong Pebrero 28, 2017 at nilagdaan ni Health Usec. Herminigildo Valle ng DoH Office for Field Implementation and Management (OFIM) kasunod ng sulat ni John Chong, ang national deputy commander ng Task Force Crusaders.

Kung maaalala, idinulog ni Chong sa DoH ang maraming reklamo kaugnay ng kawalan umano ng mga pampublikong pagamutan ng permanenteng doktor at medical staff na kadalasa’y nauuwi sa pagkamatay ng mga pasyente.

Sinabi ni Chong na laman ng kautusan ni Usec. Valle ang pag-oobliga sa mga government hospitals na magkaroon ng doktor sa lahat ng oras at hindi maaaring bibista lang ang manggagamot sa pagamutan.

Bagama’t galing sa Bacolod at Negros Occidental ang reklamo ay sakop ng kautusan ng DoH ang lahat ng government hospitals sa buong bansa. BOBBY TICZON

WALONG katao ang arestado kabilang ang dalawang binatilyo, kambal at tatlong babae kung saan isa sa mga ito ang huli sa aktong himihithit ng shabu habang karga ang anak sa drug operation ng pulisya sa Caloocan City, kagabi.

Sa imbestigasyon ni PO2 Jerome Pascual, dakong 10:30 ng gabi nang magsagawa ng drug operation ang mga tauhan ng District Drugs Enforcement Unit (DDEU) sa isang bahay sa Teachers Village, Brgy., 12 kung saan nakatira ang kambal na sina Melvin Enguio, 33 at Irish Eneuio, 33.

Huli sa akto na nagsa-shabu sa loob sina Rowena Chu, ng Magsaysay St., San Agustin, Malabon; Gilbert Tandog, 35, ng Blk. 57E, Lot 1, Phase 3 F2, Kaunlaran Village, Brgy. 8; at ang kambal na Enguio kung saan isa sa dalawang babae ang kasama pa ang anak na sanggol.

Narekober sa mga suspek ang mga drug paraphernalia at ang nakabukas na sachet na may bahid pa ng shabu habang nakuha pa kay Tandog ang dalawang sachet na naglalaman ng hindi pa mabatid na halaga ng shabu.

Nauna rito, dakong 6:00 ng gabi nang maaresto naman ng mga tauhan ng District Special Operation Unit (DSOU) sa pangunguna ni P/Insp. Jonathan Olvena sa drug buy-bust operation si Sahara Macarimbang, 29, at ang dalawang out-of-school youth na edad 17 at 16-anyos sa Blk. 13, Phase 12, Brgy. 188, Tala matapos magbenta ito ng shabu na nagkakahalaga sa P1,000 kay PO1 Esteban na umaktong poseur-buyer. RENE MANAHAN

INIUTOS ni Manila Police District (MPD) director S/Supt. Joel Coronel ang pagsibak sa mga pulis na nagongotong sa mga street vendors.

“Ngayon po ay nagbigay ako ng utos na ma-relieve sila presently from their stations and to report within 24 hours sa district headquarters para sagutin ang mga reklamo o complaint laban sa kanila,” pahayag ni Coronel.

Nauna nang dumulog ang may 50 street vendors na kasapi sa Kalipunan ng Damayang Mahirap (Kadamay) sa MPD headquarters para iparating nag kanilang hinaing laban sa mga abusadong pulis.

Humihingi anila ang mga pulis ng P100 sa bawat isa sa kanila kapalit ng pagpayag na makapagtinda sila sa lansangan.

“Kung magkano ang hingin nila, ibibigay namin. Eh, kung hindi na naman kaya, anong gagawin namin? Kung hindi na kami makabigay, ang gagawin nila kukunin nila ang mga paninda namin,” reklamo ng isa sa mga vendor na si Gina Alvarez.

Unang dumulog ang mga vendor sa presintong nakasasakop sa kanilang pinagtitindahan pero tila hindi sila naririnig kaya nagpunta na sila sa MPD headquarters.

Hindi naman pinangalanan pa ni Coronel ang mga sangkot na pulis pero maari silang maharap sa kasong criminal at administrative cases dahil sa kanilang ginawa. BOBBY TICZON

DALAWANG lalaki kabilang ang isang pasaway at ang hinihinalang sangkot sa iligal na droga ang patay matapos pagbabarilin ng hindi nakikilalang suspek sa magkahiwalay na lugar sa Caloocan City.

Ayon kay PO3 Junedy Narciso, dakong 12:45 kahapon ng madaling-araw, kainuman ni Danilo Ramos, 23, ng 247 Maranao St., Natividad Phase 2, Deparo, Brgy. 168 ang mga kaibigan sa loob ng bahay ng isang Joseph Joham Pojas sa Blk. 3 Lot 7 Orchids St., Alecon Homes, Deparo, Brgy. 167 nang biglang pumasok ang hindi kilalang suspek na armado ng baril at nakasumbrero at maskara saka pinadapa ang mga ito.

Kinaladkad ng suspek palabas si Ramos at pinagbabaril bago mabilis na tumakas habang isinugod naman ang biktima sa San Lorenzo Hospital ngunit hindi na rin ito umabot nang buhay.

Kilala umano ang nasawi sa pagiging pasaway sa kanilang lugar kung saan sangkot din umano ito sa mga insidente ng holdapan.

Nauna rito, dead-on-arrival din sa Novaliches District Hospital sa Quezon sanhi ng mga tama ng bala sa katawan si Rafael Bernabe, 31, ng Castillo Cmpd., Llano, Brgy. 167 matapos pagbabarilin ng hindi kilalang suspek na sakay ng motorsiklo habang nakatayo ang biktima sa labas ng kanilang bahay dakong 5:40 ng hapon.

Ayon sa pulisya, posible umanong may kinalaman sa iligal na droga ang motibo sa insidente dahil ayon kay Barangay 167 Executive Officer Johnny Estonido, kabilang si Bernabe sa mga nasa drug watchlist. RENE MANAHAN