BUGBOG sarado sa taumbayan ang isang nagpanggap na pulis matapos mangholdap ng pasahero sa Tondo, Maynila.
Arestado ang suspek na si Rommel Sebastian, 41, ng 1319 Masinop Street Tondo Maynila dahil sa reklamo ng biktimang si Winifredo Torres, 39, ng 139 Halcon Street Laloma, Quezon City.
Sa imbestigasyon ni SPO1 Edgar Julian ng MPD ANCAR, alas-12:00 ng madaling-araw kanina nang isagawa ng suspek ang insidente sa Wagas at Lakandula Street Tondo, Maynila.
Nauna rito, naging pasahero ng biktima ang suspek nang sumakay sa Blumentritt at nagpahatid sa area ng Tondo.
Nang may madaanang tindahan ay inutusan ng suspek ang biktima na bumili ng sigarilyo ngunit pagbalik nito ay wala na ang kanyang minamanehong tricycle na Honda Motorcycle na may plakang (1170-TA) kaya inireport ito sa pulisya.
Ganap na ala-1:00 kaninang madaling araw ay namataan ng biktima ang kanyang tricycle sa Blumentritt na nakaparada kaya humingi ng tulong kay Antonio Villaruel, tanod ng Barangay 33, Zone 3 .
Nang makita ang suspek ay nagkaroon ng habulan hanggang sa makarating sa Tondo, na naging dahilan upang makorner ng taong bayan at nabugbog ang pekeng pulis.