ININTINDI na lang ng Malakanyang ang paghihimutok ni Commission on Elections Chairman Sixto Brillantes Jr. kay Pangulong Benigno Aquino III dahil umano sa maling posisyon na ipinagkatiwala sa kanya.
Nabatid na gusto ni Brillantes na masungkit ang ambassador post subalit ang pagiging chairman ng Comelec ang ibinigay sa kanya.
“Siguro po may konting pag-intindi naman po tayong ini-extend kay Chairman Brillantes dahil din po doon sa laki ng trabahong kailangan po nilang gawin at kanila pong challenge na kinakaharap..” ayon kay Deputy Presidential spokesperson Abigail Valte.
Batid naman aniya nila na may kinahaharap na “frustrations” si Chairman Brillantes at under pressure ito sa Comelec dahil parating na ang eleksyon sa Mayo kaya’t inuunawa na lamang nila.
“Nagbalak si Chairman Brillantes magpahinga sa weekend. Sana mabuti ang pahinga para sa pagpasya bukas,” ani Usec. Valte.
Si Brillantes ay nagbabalak na magbitiw sa pwesto dahil dismayado siyang hindi nakuha ang gustong posisyon mula kay Pangulong Aquino.
At gaya aniya ng sinabi ni Pangulong Aquino na kulang-kulang isang buwan na lamang ay eleksyon na sa bansa ay inamin nitong mahihirapan siya na makahanap agad ng makakapalit ni Brillantes.
Nauna nang nagbanta si Brillantes na magbibitiw sa puwesto matapos magpalabas ng temporary restraining order (TRO) ang Korte Suprema sa ipinalabas na resolusyon ng komisyon hinggil sa limitadong campaign airtime ng mga kandidato sa radio at telebisyon.