HINIHINALANG namatay dahil sa heat stroke ang isang matandang palaboy na natagpuang patay sa gilid ng kalsada, malapit sa isang creek sa Malate, Maynila.
Inilarawan ang biktima na nasa edad na 55 hanggang 60-anyos, nasa 5’2 hanggang 5’4 ang taas, may tattoo na “Warrios” sa kanang hita, nakasuot ng kulay dilaw na T-shirt at violet na short pants.
Batay sa ulat na isinumite ni Det. Glenzor Vallejo, kay P/Insp. Steve Casimiro, hepe ng Manila Police District-Crime Against Persons Investigation Section, dakong 5:46 ng umaga nang madiskubreng patay ang matandang palaboy nang magsagawa ng clearing operation ang mga tauhan ng MPD-Malate Police Station 9 sa kahabaan ng Mabini St., sa Malate.
Inakalang natutulog lamang ang biktima ngunit nang lapitan ay isa na pala itong bangkay.
Agad naman itong ipinagbigay-alam sa MPD-Headquarters.
Nang suriin ang bangkay ay walang nakitang indikasyon na pinatay o pinahirapan ang biktima, kaya pinaniniwalaang na-heat stroke ito dahil na rin sa nararanasang matinding init ng panahon.