HANGGANG sa kasalukuyan ay tulala ang isang padre de pamilya matapos na matagpuan ang kanyang mag-iina na wala ng buhay at palutang-lutang sa ilog sa bayan ng Libmanan, Camarines Sur.
Sa report na nakarating sa Camp Crame, personal na kinilala ni Cedio Sacro, 38, ang kanyang mag-iina na sina, Maricel Sacro, 19, at ang dalawang anak nito na sina Jocelyn at Jonalyn, pawang nakatira sa Brgy. Puro Batia sa bayan ng Libmanan, Camarines Sur.
Nabatid sa mga nakalap na impormasyon ni PO2 Riche Oliver ng Libmanan Police station, na madalas biruin ng kanilang mga kapitbahay ang biktimang si Maricel na may ibang babae na ang kanyang mister kung kaya’t laging gabi na kung umuwi sa kanilang bahay.
Dahil sa madaling pumatol at mapaniwala ang misis ay dinamdam nito at pinaniwalaan ang mga biro at ginagawang panunukso ng kanilang mga kapitbahay na humantong sa kanyang pagpapakamatay at dinamay pa ang dalawang anak.
Ang mag-iinang biktima ay natagpuan na magkakatali sa isa’t isa gamit ang panali sa nipa na ginagamit ng kanyang asawa sa paggawa ng mga pawid.