BINAWIAN nang buhay habang ginagamot Taguig-Pateros District Hospital ang empleyado ng Taguig City Hall at sinasabing political supporter ni mayoralty bet Rica Tinga matapos pagbabarilin Biyernes ng hapon.
Ayon sa Investigation and Detective Management Section ng Taguig City police, namatay si Jeff Gabriello Minglana, 44-anyos, taga-Better Living, Parañaque City, dahil sa tinamong apat na fatal gunshot wounds.
Lumalabas sa imbestigasyon na papauwi na sa kanilang bahay si Minglana nang ratratin sa tapat ng Heavens Door Academy sa Upper Bicutan.
Agad na tumakas ang suspek sakay ng motorsiklo.
Napag-alamang si Mingla ay kasalukuyang empleyado sa city hall at dating department head ng Business Permit and Licansing Office ng dating mayor ng lungsod na si Freddie Tinga.
Tumatakbo ngayon sa pagka-mayor ang kapatid ni ex-Mayor Tinga na si Rica Tinga na sinusuportahan din ng biktima.
Habang nagluluksa ang mga kaanak at kaibigan ng yumaong biktima, patuloy naman sa pagsisiyasat at pangangalap ng karagdagang impormasyon ang awtoridad upang matukoy at madakip ang suspek.