NGAYON pa lang ay pinag-iimpake na ng Philippine embassy ang mga Pinoy na nasa South Korea bilang paghahanda sa oras na lumala ang tensyon laban sa North Korea na nagbanta ng giyera.
Ani Consul Rederico Atienza, bagamat handa na ang contingency plan at nasa normal pa ang sitwasyon sa nasabing bansa, mainam na rin aniya ang handa para sa kaligtasan ng mga Pinoy sa pag-atake ng North Korea.
Kasunod nito, inabisuhan din ng embahada ang mga kababayan na manatiling kampante at regular na makipag-ugyanan sa community leaders maging sa embahada at laging mag-monitor sa sitwasyon.
Mainam na aniya ang nakahanda na ang gamit ng mga Pinoy tulad ng mga nakaimpakeng damit at pagkain upang madaling bitbitin sakaling lumala ang tensyon.
Pinawi naman ng Philippine embassy ang pangamba ng mga kamag-anak sa Pilipinas sa pagsasabing naghahanda ang pamahalaan para matiyak ang kaligtasan ng mga kababayan sa Korean Peninsula.
Nasa 42,000 ang bilang ng mga Pinoy na nasa South Korea, habang hindi pa mabatid ang bilang ng mga Pinoy na nasa sa North Korea.