NAHAHARAP sa kaso ang isang Indonesian flight attendant sa Dubai matapos tangkang gahasain ang isang Pinay na kanyang katrabaho.
Ayon sa Pilipinang di pinangalanan, inimbita siya ng Indonesian para uminom sa isang club sa Dubai na kanya namang pinaunlakan.
Nang matapos ang kanilang inuman ay medyo nakaramdam na ang Pinay ng pagkahilo kaya nagyaya na itong bumalik sa tinutuluyang hotel na inihatid naman siya ng Indonesian.
Pagsapit sa tinutuluyang kuwarto ng hotel ay bigla na lamang niyapos ng Indonesian at pinaghahawakan ang maseselang bahagi ng katawan ng Pinay.
Kahit hilo pa ay nagawang manlaban ng Pinay kung saan sinipa niya sa dibdib ang Indonesian na nakaibabaw sa kanya saka tumakbo palabas ng kuwarto ang Pinay at humingi ng tulong sa security personnel ng hotel.
Todo tanggi naman ang lalaki na tinangka niyang gahasain ang Pinay, bagamat di rin siya pinakawalan ng mga pulis dahil di siya pinayagan na makapaglagak ng piyansa ng Dubai Court of First Instance kaya makukulong siya hanggang sa pagdinig sa kanyang kaso sa Abril 9.
Tumestigo naman ang isang forensic examiner na walang anumang nakitang galos o ebidensya sa katawan ng Pinay na nakipaglaban o nakipag-away bagamat hindi sapat ang testimonya niya para di sumailalim ang Indonesian sa imbestigasyon at pagharap sa kanyang kaso sa Dubai Court.