WINAKSAN ng isang 16-anyos na estudyante ang kanyang sariling buhay sa pamamagitan ng pagbaril sa dibdib sa kanilang tirahan sa Las Pinas City, Huwebes.
Namatay habang ginagamot sa Perpetual Help Hospital ang biktimang si James Mathew Dagondon sanhi ng tinamong isang tama ng bala sa dibdib at idineklarang patay na dakong alas-2:30 ng hapon.
Sa imbestigasyon nina SPO1 Richard Credo at PO2 Christian Yanga ng Station Investigation and Detective Management Section ng Las Pinas police, naganap ang insidente ng pagpapatiwakal dakong ala-1:20 ng hapon sa loob ng tirahan ng biktma sa Fernandez St., BF Resort Village, Talon Dos sa naturang lungsod.
Ayon sa pulisya, kararating lamang umano mula sa bansang Australia ng ama ng biktima na si James Henry Dagondon, 44-anyos, nang mangyari ang insidente kaya’t hindi na nito inabot nang buhay ang panganay na anak.
Nag-iwan pa umano ng suicide note ang biktima subalit hindi na ito pinabasa ng mga magulang ng biktima sa pulisya at nakiusap sa mga imbestigador na huwag nang maisapubliko ang dahilan ng pagpapatiwakal.