KULONG ang dalawang miyembro ng “laglag barya” habang nakatakas ang isa pang kasama nang madaanan ng mga pulis matapos mambiktima ng bebot sa loob ng dyip sa Caloocan City, Biyernes ng umaga.
Nakilala ang mga suspek na sina Emerson Perez, 43-anyos at taga-Dagat-dagatan, Malabon City at Armando Sabalbarino, 46, ng Navotas, habang inaalam na kung sino ang nakatakas na kasama ng mga una.
Batay sa ulat, dakong alas-11:00 ng umaga, nakasakay ng mga suspek ang biktimang si Edan Sinagub, 30, sa dyip at pagsapit sa Rizal Avenue Ext., Monumento ng lungsod ay nagsimulang naglaglag ng mga barya ang mga suspek.
Nakitulong na mamulot ang biktima subalit sinamantala ng isa sa mga suspek na matastas ang dalang shoulder bag ng una at makuha ang dalawang cellphone at iPad.
Matapos magsenyasan ay pumara ang mga suspek at bumaba subalit nalaman ng biktima ang ginawa sa kanya ng mga una na naging dahilan upang pasigaw na habulin ang mga suspek.
Sakto namang padaan ang mga pulis na naging dahilan upang habulin ang mga suspek at madakip ang dalawa.
Nabawi ang Cherry mobile ng biktima ngunit nakatakas ang isa kasama ng dalawa tangay ang Samsung Star at iPad ng biktima.