LA UNION – Dead on arrival sa Bacnotan District Hospital ang isang lalaki samantalang malubhang nasugatan naman ang kasamahan nito matapos bumangga ang sinasakyan nilang motorsiklo sa nasabing lalawigan Lunes ng gabi.
Ang biktimang hindi na umabot ng buhay sa nasabing ospital ay nakilalang si Francisco Sanchez, 35, ng Poblacion Ligaya, Gabaldon, Nueva Ecija. Ang kasama ng biktima na si Abremundo Ortiz, ng Barangay Camiling, Balaoan, La Union ay itinakbo sa Ilocos Regional and Medical Center.
Sa inisyal na imbestigasyon ng La Union Philippine National Police (PNP), naganap ang insidente sa national road ng Barangay Guinabang, Bactotan, La Union.
Ayon sa police, mabilis umano ang takbo ng motorsiklo na sinasakyan ng mga biktima at ito ay nawalan ng control habang papaliko sa isang kurbada.
Parehong tumilapon ang mga biktima ngunit si Sanches ang napuruhan sa ulo dahil wala itong helmet na suot noong mangyari ang insidente.
Pareho umanong naka-inom ang biktima at papauwi na ang mga ito nang mangyari ang insidente.