ITINIGIL na ang retrieval operation ng rescue team makaraang matagpuan na ang 14 na mga bangkay sa naganap na landslide sa Sitio Upper Mahiao, Barangay Lim-aw, Kanangga, Leyte noong nakaraang Biyernes.
Ayon kay Col. Joel Nacnac, commanding officer ng 19th Infantry Battalion, kaninang alas-9:00 ng umaga nang nagdaos ng misa sa pinangyarihan ng landslides upang magbigay pugay sa mga namatay sa pagguho ng lupa.
Nasa state of decomposition na ang mga bangkay matapos ang higit isang linggong pagkakalibing nila nang buhay.
Matatandaang noong nakaraang araw ay ipinasuspinde ng Department of Energy (DoE) ang operasyon ng Energy Development Corporation (EDC) sa lugar na lubhang natabunan ng lupa.
Kasalukuyan nang nagsasagawa ng masusing imbestigasyon ang iba’t ibang mga ahensya ng gobyerno upang malaman kung ano ang naging sanhi ng landslides.