MADALING kinalos ng Talk ‘N Text Tropang Texters ang Global Port Batang Pier habang makapigil hininga naman ang panalo ng Petron Blaze Boosters sa Meralco Bolts.
Umarangkada ng 26 puntos, 11 rebounds at limang blocks si Renaldo Balkman upang itakas ang 88-86 panalo ng Boosters laban sa Bolts kanina sa naganap na 2013 PBA Commissioner’s Cup sa Smart Araneta Coliseum.
Tinambakan ng Boosters ang Bolts ng 22 puntos sa third canto, 76-54 subalit humabol ang huli matapos ang three-pointer ni Chris Ross 87-86 may 25.6 na lang sa fourth period.
Sa sumunod na eksena ay na-foul si Denok Miranda upang puwesto sa free throw line at isalpak ang isa sa dalawang tira.
Hindi naman nagawang pumuntos ang Bolts kaya nalista ng Petron ang ikatlong sunod na panalo para sa 3-1 win-loss slate.
Si Booster center June Mar Fajardo ang sumegundo sa opensa na may tinikadang 16 points, 12 borads at tatlong blocks.
Samantala, sa unang sultada pinagpag ng Tropang Texters ang Batang Pier, 99-79.
Apat lang ang lamang ng Tropa sa halftime, 49-45 subalit unti-unti itong lumayo sa third canto ng magsimulang ipakita ni import Keith Benson ang tikas sa opensa at depensa.
Umariba si Benson ng 20 markers, 19 rebounds at limang supalpal habang nag-ambag si Jayson Castro ng 19 pts. at tig dalawang assists at rebounds.