KUMPIYANSA ang isang solon na idinadawit sa pork barrel scam na maidedepensa niya ang kanyang sarili sakaling iakyat sa Sandiganbayan ang usapin.
“I am very confident that we will be victorious in the end and Mrs. Tuason will crumble in cross examination,” ani Sen. Jinggoy Estrada sa isang national TV interview nitong Biyernes.
Reaksyon ito ng senador kasunod ng immunity na ibinigay ng Ombudsman kay Ruby Tuason matapos isauli ang P40 million manager’s check kay Ombudsman Conchita Morales na sinasabing kickback nito mula sa pork barrel ni Estrada.
Si Tuason ay dating tauhan at kaibigan ng pamilya Estrada na bumaliktad at tumestigo laban sa senador.
Aniya, inaasahan na niya na bibigyan ng immunity si Tuason bagama’t kasama ito sa isa mga akusado ng DoJ, NBI at sa joint resolution na unang inilabas ng Ombudsman para palabasin na patas ang isinasagawang imbestigasyon sa isyu ng pork barrel scam.
Ipinagtataka rin ng senador kung paano nakuha o umabot lamang sa P40 milyon ang nakamkam ni Tuason mula sa maanomalyang P10 bilyong pork barrel at Malampaya scam.
Paulit-ulit na rin aniyang sinabi ni Sen. Teofisto Guingona na agad na sisimulan ang imbestigasyon kaugnay sa Malampaya scam subalit nababalam pa rin hanggang ngayon.
Kokonsultahin din niya ang kanyang mga abogado kung ano ang susunod na magiging hakbang niya sa desisyon ng Ombudsman na immunity kay Tuason.
The post Immunity kay Tuason ‘di nakagugulat – Jinggoy appeared first on Remate.