REHAS na ang hinihimas ngayon ng isang messenger matapos ireklamo ng paulit-ulit na panghahalay ng dating ka-live-in sa Valenzuela City.
Nahaharap sa kasong illegal detention at 6 counts na rape si Marck Lugaray, 32, tubong Negros Occidental.
Sa pahayag ng biktima na edad 27, call center agent, taga-PNR Cmpd., Caloocan City, ilang taon silang nagsama ng suspek subalit napilitan siyang kalasan ito dahil sa ginagawang pananakit.
Noong nakalipas na Lunes, dakong alas-9:00 ng gabi ay inabangan ng suspek ang biktima sa paglabas ng bahay at sinabing ihahatid sa kapatid ng babae sa Pasig.
Todo-tanggi ang biktima subalit nang sabihin ng suspek na ihahatid lang siya at tuluyan na silang maghihiwalay ay napapayag ang babae.
Subalit sa halip na sa Pasig ay idiretso ng suspek ang dalang motorsiklo sa dati nilang tinirhan ng biktima sa Tampoy 1, Marulas ng lungsod at doon kinaladkad papasok hanggang sa mahalay.
Ikinulong ng suspek ang biktima at paulit-ulit na hinalay at kahapon ay nakakita ng pagkakataon na makatakas ang babae at umuwi sa kanila at sinabi sa mga kaanak ang nangyari.
Sinamahan ang biktima sa presinto at nagreklamo na naging dahilan upang damputin ang suspek at sampahan ng mga nasabing kaso.