SUGATAN ang isang tauhan ng Taguig City police nang makaengkwentro ng kanilang grupo ang mga miyembro ng sindikato na nagnanakaw ng motorsiklo kung saan naaresto ng dalawa nilang kasamahan kaninang madaling-araw sa nabatid na lungsod.
Kinilala ni National Capital Region Police Office (NCRPO) chief Police Director Carmelo Valmoria ang mga nadakip na sina Ricardo Aver Gonzado, 40, ng Barangay Ususan at Danilo Basco, 30, ng Barangay Pinagsama habang pinaghahanap naman ng pulisya ang kanilang mga nakatakas na kasamahan.
Sugatan sa naturang police operation si PO2 Ardi Vergara ng Taguig police na kaagad nilapatan ng lunas sa Rizal Medical Center at naideklarang nasa ligtas ng kalagayan.
Batay sa ulat, nagsasagawa ng pagpapatrulya sina Chief Insp. Benito Basilio ng Criminal Investigation Unit ng Taguig police, dakong ala-1 ng madaling-araw nang mapuna ang mga nakaparadang motorsiklo na ang ilan ay baklas na ang piyesa sa Phase 2 Block 4 Lot 1, Bgy. Pinagsama.
Papalapit pa lamang ang mga awtoridad sa nabatid na lugar upang sitahin ngunit sinalubong na sila ng mga putok ng baril na ikinasugat kaagad ni Vergara.
Agad namang nakapagresponde sina S/Insp. Joey Prieto ng Intelligence and Anti Carnapping, pati na ang mga tauhan ng Tactical Motorcycle Reaction Unit (TMRU) at Special Reaction Unit (SRU) ng Taguig police kaya’t tumagal ng halos 10-minuto ang barilan bago nadakip ang mga suspek.
Narekober ng pulisya sa dalawang suspek ang isang kalibre .9mm at isang kalibre .45 baril, habang nakuha sa lugar ang iba’t ibang uri ng mga piyesa na mula sa kinatay na motorsiklong kanilang tinangay.
Inirekomenda naman ng pamunuan ng Taguig police ang paggawad ng Medalya ng Sugatang Magiting kay Vergara habang Medalya ng Kadakilaan sa mga pulis na nagresponde at nakadakip sa dalawang suspek.
The post PNP-Taguig nakaengkuwentro ang mga agaw motorsiklo appeared first on Remate.