DAHIL sa mabahong amoy ng comfort room kaya nasibak ang isang Police Community Precinct (PCP) commander sa Quiapo, Maynila.
Nabatid na nag-ugat ang pagsibak ng bagong OIC ng Manila Police District na si Chief Supt. Rolando Asuncion kay C/Insp. Joselito Desesto, hepe ng Barbosa-PCP nang makita ang CR ng nasabing istasyon na nanggigitata bukod pa sa hindi maayos na suot ng uniporme ng mga pulis na naka-duty.
Nauna rito, nagpanggap na magpapa-blotter lamang si Asuncion na noo’y hindi nakilala ng mga pulis.
Gayunman, dahil sa hindi na natiis ang kanyang nakikita sa loob ng presinto ay nagpakilala na ang heneral.
Sanhi nito, itinalaga ni Asuncion bilang bagong Barbosa PCP si S/Insp. Alden Panganiban habang si Desesto ay itinalaga sa District Public Safety Battalion (DPSB).
Nagbabala si Asuncion sa lahat ng opisyal ng MPD na sisibakin sila sa kanilang puwesto sa sandaling maabutan na nanggigitata ang kanilang himpilan.
The post PCP commander sinibak dahil sa mabahong CR appeared first on Remate.