PAGHIHIGANTI ang nakikitang motibo ng mga awtoridad sa nangyaring pamamaslang sa 29-anyos na ginang na pinagbabaril habang naglalamay sa burol ng tiyahin kaninang madaling-araw sa Pasay City.
Hindi na umabot nang buhay sa Pasay City General Hospital ang biktimang si Desiree Hilario Santiago, ng 2472 M. Dela Cruz St., sanhi ng mga tama ng bala sa ulo at likurang bahagi ng katawan habang mabilis namang tumakas ang nag-iisang salarin na nakasakay sa motorsiklo.
Sa ulat, naglalaro ng tong-its sa lamay ng tiyahin sa M. Dela Cruz St. ang biktima nang pumarada sa kanyang tabi ang isang motorsiklo, alas-4 ng madaling-araw, sakay ang lalaking may kalakihan ang katawan, nakasuot ng itim na jacket at pulang crash helmet at biglang pinagbabaril ang biktima.
Mabilis na tumakas ang suspek makaraan ang pamamaril patungong Arnaiz Avenue habang isinugod naman ng kanyang biyenang si Zenaida Santiago ang biktima sa pagamutan kung saan siya idineklarang dead on arrival.
Napag-alaman na ang biktima ay asawa ni Ronald Santiago alyas “Onat” na pinaghihinalaang pumaslang sa pulis na si PO3 Zoilo Manalo, nakatalaga sa Southern Police District (SPD) at sa asawa nitong si Elvie Manalo noong Hulyo 2011 sa Barangay Poblacion, Malvar, Batangas.
Nadakip si Santiago at kasalukuyang nililitis sa kinakaharap na kasong double murder habang nakapiit sa Batangas provincial jail.
Ayon sa isang testigong tumangging magpabanggit ng pangalan, posible aniyang paghihiganti o ilegal na droga ang motibo sa naturnag krimen bagama’t nilinaw ng pulisya na bineberipika pa nila ang mga nakalap na impormasyon.
The post Ginang pinagbabaril sa lamay ng tiyahin, patay appeared first on Remate.