IPINAHAYAG ng Metropolitan Manila Development Authority (MMDA) na pararangalan nila ang mapipili nilang pinakamalinis na palengke sa buong Metro Manila upang maengganyo ang bawat pampublikong pamilihan na panatilihin ang kalinisan sa kanilang lugar.
Ang naturang pahayag ay bahagi ng kanilang isinasagawang “Linis Palengke Program” kung saan ay pinasadahan nila ang Muntinlupa Public Market.
Nagtulong-tulong ang may 150 MMDA personnel mula sa Solid Waste Management Office, Metro Parkways Clearing Group, at Flood Control and Sewerage Management office upang maglinis, mag-alis ng mga bara sa kanal, magpintura at magsasaayos ng paligid ng naturang palengke.
Napag-alaman kay MMDA Chairman Francis Tolentino, na ikaapat na palengkeng pinasadahan ng kanilang ahensiya ang naturang pamilihan mula nang ilunsad ang programa noong nakaraang taon.
Sinabi pa ni Tolentino , hindi lamang kaayusan at kalinisan ng mga pampublikong pamilihan ang layon ng programang ito kundi para na rin sa kaligtasan ng mga mamimili.
The post Malinis na palengke pararangalan ng MMDA appeared first on Remate.