BAGAMA’T pinakawalan na kaninang madaling-araw, Disyembre 20 ang titser na dinukot sa Basilan, mahigit isang buwan na ang nakalilipas, bihag pa rin ng kidnappers ang mister nitong barangay chairman.
Nakahihiya man, pero nakauwi sa Zamboanga City nang walang tulong mula sa awtoridad ang biktimang si Saharina Salvador Francisco, pero hindi nito kasama ang kanyang mister na si Pilardo Roxas Francisco, ang bagong upong barangay chairman ng Landugan municipality na pinaiwan sa hindi mabatid na kuta ng kidnappers.
Ayon sa Basilan Provincial PNP, ibinaba ang guro sa isang pumpboat sa shoreline ng R.T. Lim Boulevard malapit lamang sa Philippine Ports Authority (PPA) sa lungsod dakong 5:30 ng madaling-araw.
Dumiretso naman agad ang biktima sa loob ng daungan at sumakay sa first trip ng passenger fast craft patungong lalawigan ng Basilan.
Nabatid na ang kapatid ng guro na si Jamil Salvador ang nag-report sa pulisya sa Basilan na nakalaya na ang kanyang kapatid.
Kung matatandaan, dinukot ng mga suspek ang mag-asawa, alas-10:30 ng umaga noong Nobyembre 16 at isinakay sa isang pumpboat.
Ayon naman sa anak ng mag-asawa na si Jhayco Salvador Francisco, papunta sana sa kabilang munisipyo ng Maluso ang kanyang mga magulang nang harangin ng nasa walong armadong kalalakihan na nakasuot ng camouflaged uniform.
Tatlong araw makalipas ang pagdukot sa mag-asawa, kinumpirma ng awtoridad na humihingi ng P15 milyon ransom demand ang mga kidnapper kapalit ng kalayaan ng mag-asawa.
Hinihinalang ang grupong Abu Sayyaf ang responsable sa panibagong kidnapping incident.
Sa ngayon ay hindi pa malinaw sa awtoridad kung may binayarang ransom money ang pamilya ng biktima kapalit ng paglaya ng guro.
The post Titser na dinukot, pinalaya, mister na tserman, bihag pa appeared first on Remate.