IPINAHAYAG ni Kabataan Partylist Representative Terry Ridon na mas malalaki ang mga ‘daga’ sa Malacañang kaysa sa mga nasa loob ng National Bureau of Investigation.
Ito ang naging reaksyon ni Cong. Ridon makaraang makarating sa kanyang tanggapan ang impormasyong kumakaladkad sa pangalan ng mga Abad sa tinaguriang ‘pork barrel queen’ na si Janet Lim-Napoles.
Ginawa ni Ridon ang pahayag makaraang lumabas sa REMATE at sa radyo DZBB, sa pamamagitan nina Lolit Solis at Arnold Clavio, ang balitang kabilang sa mga dumadalo sa mga pa-party ni Napoles si Julia Abad na pinuno ng Presidential Management Staff at anak nina Budget and Management Secretary Butch Abad at Batanes Congresswoman Henedina Abad.
Nabatid na kabilang sa mga pinakamalapit na kaibigan at kaalyado sa pulitika ni Pangulong Benigno Aquino III ang mag-asawang Abad.
Ito rin ang pinaniniwalaang dahilan kung bakit ang anak nilang si Julia ang ginawang pinuno ng PMS na may hawak sa mga sensitibong gawain ng Pangulo.
Matatandaang lumabas sa REMATE na nakita ni Lolit Solis, isang sikat na talent manager, si Julia na dumalo umano sa pa-party ni Napoles sa Heritage Park.
Kung saan lantaran pa umanong namigay ng sako-sakong salapi sa mga dumadalo si Napoles.
Ayon naman kay Atty. Harry Roque dapat umanong imbestigahan si Julia, kabilang na ang kanyang mga magulang, kung ano ang koneksyon ng mga ito sa ‘pork barrel queen.’
“Lumabas na sila at magpaliwanag huwag na nilang hintaying makaladkad pa ang pangalan nila. Maawa naman sila sa taumbayan,” dagdag pa nito.
Kaugnay pa ng isyu sa ‘daga’ sa Malacañang, matatandaang may mga nagsilabasang balita na umano’y hiningan ni Executive Secretary Paquito Ochoa si Napoles ng campaign fund nang tumakbo si Pangulong Noynoy sa pagka-Presidente noong halalang 2010.
The post Mas malalaki ang ‘daga’ sa Malacañang appeared first on Remate.