PLANO nang pamunuan ng Metropolitan Manila Development Authority (MMDA) ang pagbubukas ng panibagong impounding area matapos mapuno ng mga sasakyan ang kanilang impounding area sa Pasig City makaraang magsagawa sila ng operasyon laban sa mga colorum na pampublikong sasakyan na umabot sa mahigit 34 sasakyan sa kahabaan ng EDSA.
Napag-alaman kay MMDA Chairman Francis Tolentino, balak nilang magbukas ng panibagong impounding area sa Marikina at Tagaytay City makaraang mapuno ng mga kolorum na sasakyan ang dati nilang impounding area matapos nilang ipatupad ang Operation Goliath o magkakasunod na crackdown ng kanilang ahensiya katuwang ang mga tauhan ng Land Transportation Franchising and Regulatory Board (LTFRB).
Aniya, kamakalawa mahigit sa 34 mga colorum na vehicle na kinabibilangan ng provincial buses, taxi at utility vehicle ang kanilang nahuli sa kahabaan ng EDSA.
Ayon kay Tolentino, mabilis na napuno ang impounding area sa Pasig City dahil malaki ang kinaing espasyo ng malalaking bus lalo’t patuloy ang kanilang panghuhuli sa mga colorum na sasakyan na bumibiyahe sa kahabaan ng EDSA at sa iba pang mga lansangan.
Sinabi pa ni Tolentino nais nilang taasan ang multa ng tubos ng mga mahuhuling kolorum na sasakyan na dating naunang ipinalabas nila ay nasa P6,000 multa lamang sa mga mahuhuling kolorum.
Dahil sa mababang multa agad natutubos ng operators ang kanilang mga sasakyang kolorum at muling nakababalik sa lansangan.
Sinabi pa ni Tolentino may mga rekord na silang hawak sa mga kolorum na bus at taxi na hindi na puwedeng bumiyahe sa lansangan.
The post MMDA magbubukas ng bagong impounding area appeared first on Remate.