KINASUHAN na ng rape with homicide ang anim na suspek na itinuturong gumahasa at brutal na pumatay sa 26-anyos na dalaga na si Leah Lee Cipriano ng Brgy. Estancia, Kalibo, Aklan.
Ang Philippine National Police (PNP) ang nagsampa ng kaso sa Aklan Provincial Prosecutor’s Office laban sa anim na lalaki matapos na magpalabas ng affidavit of confession si Edward Macawili, isa sa mga suspek na sumuko sa mga awtoridad.
Ang iba pang mga suspek ay kinilalang sina Reden Tomulog, Salcedo Tomulog, Geneses Pu-od, Lindley Yufano at Edwardo Macawili Jr., pawang mga residente ng Brgy. Agbalogo, Makato, Aklan. Ang lima ay nananatiling at-large sa ngayon.
Napag-alaman na si Leah Lee ay nawala noon pang Mayo 21 at nakita na lamang na naagnas na ang bangkay na itinali, inilagay sa sako at inilibing sa isang hukay sa bulubunduking bahagi ng Brgy. Agbalogo, Makato.
Base sa salaysay ng testigo, kusang sumama ang biktima sa isa sa mga suspek na si Reden Tomulog kung saan dinala niya umano ito sa kubo malapit sa isa pang kubo ng kanyang mga nag-iinumang barkada sa naturang lugar. Naganap ang gang rape dahil sa kalasingan ng mga suspek.
Nang mawalan umano ng malay ang biktima ay itinali nila ito at inilibing.
The post Rape suspek kinasuhan na appeared first on Remate.