HINOLDAP na binaril pa ng may anim na armado at maskardong kalalakihan ang isang Bukidnon town mayor kaninang umaga (Mayo 11) sa nasabing bayan.
Bukod sa kinulimbat ang hindi pa malamang halaga ng pera ng biktimang si Julito Salahid, mayor ng bayan ng Kadingilan sa Bukidnon ay binaril pa ito sa kanang paa kaya isinugod ito agad sa isang ospital sa Don Carlos.
Ayon kay Inspector Ooliver Guibao, hepe ng Kadingilan PNP, naganap ang insidente dakong 8:30 ng umaga sa Barangay Bocboc, Don Carlos Bukidnon.
Bago ito, sakay sa kanyang kotse ang biktima pero pagsapit sa lugar ay hinarang ng may anim na suspect na sakay sa tatlong motorsiklo.
Kinuha ng mga suspect ang pera sa pitaka ng biktima pero bago tumakas ay inasinta ng isa sa mga holdper ang kanang paa ni Salahid bago nagsitakas sa hindi malamang direksyon.
Naniniwala naman si Guibao na may koneksyon pa rin ang insidente sa pulitika pero ipinalabas ng mga suspect na panghoholdap lamang ang motibo para ilihis ang ikakasang imbestigasyon ng pulisya.