MAHIGIT P45 milyon jackpot ang naiuwi ng 56-anyos na dating kawani ng binuwag na National Water Sewerage Authority (NAWASA) makaraang solong mapanalunan ang 6/45 Mega Lotto na binola noong Abril 29 sa tanggapan ng Philippine Charity Sweepstakes Office (PCSO) sa Pasay City.
Kinuha ng mapalad na nagwagi ang tamang kombinasyon na 34-37-17-09-14-21 mula sa araw ng kapanganakan ng kanyang apo na may katapat na kabuuang premyong P45,049,768.20
Ayon kay PCSO General Manager Jose Ferdinand Rojas II, isa ang nagwagi sa libo-libong kawani ng NAWASA na puwersahang pinagbitiw sa trabaho matapos maisapribado ang naturang kompanya.
Nang maubos ang natanggap niyang salapi, nabigo nang mabayaran ng nagwagi ang inutang na bahay at lupa sa GSIS hanggang sabihan siya ng isang eviction lawyer na hindi na niya mababayaran ang P.3 milyon maliban na lamang kung tatama siya sa lotto.
Nagsilbing hamon ang pahayag ng abogado kaya pinaglaanan na ng nagwagi ang pagtaya sa lotto hanggang masapol niya ang tamang kombinasyon.