HINIHINALANG sobrang pagod at antok ang naramdaman ng isang retiradong Overseas Filipino Worker (OFW) kaya nagkamali sa kanyang pagmamaneho ng kanyang Sports Utility Vehicle (SUV) nang mabangga niya ang salamin ng isang kilalang fast food chain na kanyang kinainan na nagresulta sa pagkakasugat ng isang crew dito kaninang madaling araw sa Pasay City.
Isinugod sa San Juan De Dios Hospital si Rizalde Largado, 29, service crew ng nasabing fast food chain sa kahabaan ng Andrew Avenue malapit sa NAIA Terminal 3 matapos tamaan ng mga bubog ng nawasak na salamin makaraang salpukin ng minamanehong Toyota Revo (WGA-344) ni Segundo Martinez, 60, ng No. 2 Montisito, Newport City, Pasay dakong alas-4:16 ng madaling araw.
Lumabas sa pagsisiyasat ni SPO1 Ricky Murillo ng Pasay City Police Traffic Enforcement Unit na paalis na si Martinez sa harapan ng fast food chain matapos kumain nang almusal ng umabante ang sasakyan sa halip na umatras na nagresulta sa pagsalpok ng sasakyan sa salamin papasok sa loob ng establisimiyento.
Bagama’t ikinatwiran ni Martinez na nagloko ang makina ng sasakyan, may hinala ang pulisya na inantok ang retiradong OFW kaya nagkamali ng pagmamaneho lalo na’t napag-alaman na galing pa ito sa Baguio at dumaan lamang upang kumain sa naturang burger chain.