MULI na namang sumalakay ang mga notoryus na “carnapper” sa lungsod ng Makati makaraang tangayin ng mga ito ang mamahaling “sports utility vehicle (SUV)” ng isang real state agent.
Iniulat ng biktimang si Juan Miguel Andal, 28, ang pagtangay ng mga salarin sa kanyang Honda CRV (ZKv-121) nang ipapasok na niya sa garahe sa kanyang bahay sa kanto ng Binay at San Antonio Street sa naturang lungsod.
Batay sa salaysay ni Andal sa Makati Anti-Carnapping Unit, dakong ala-1:40 ng madaling araw ay ipapasok umano nito sa garahe ang sasakyan makaraang buksan ang gate ng compound nang huminto ang isang Toyota Fortuner at lumabas ang dalawang lalaki.
Sa kuha ng “closed circuit television camera” sa tapat ng compound, isa sa dalawang lalaki ang lumapit kay Andal at sinundan siya sa driver’s seat saka tinutukan ng baril.
Tinangay ng salarin ang susi ni Andal habang sumakay naman sa passenger seat ang dalawa pang lalaki saka mabilis na pinasibad ang behikulo.
Nakatakdang humingi ng tulong sa mga video expert ang biktima upang makilala ang mga suspek.
Inialarma naman ang pagkawala ng naturang sasakyan sa buong pulisya ng Metro Manila at karatig lalawigan.