PAGKAGULAT ang naging reaksyon ni Task Force Tugis Chief, Senior Superintendent Conrado Capa sa pagsibak at paglipat sa kanya ng PNP sa ibang puwesto matapos matagumpay na mahuli ang negosyanteng si Delfin Lee.
Kinumpirma ni Capa na natanggap na niya nitong Miyerkules ang kautusan.
Ibig sabihin nito, mababakante na ang kanyang posisyon bilang task force head at malilipat siya bilang deputy regional director for operations ng Provincial Regional Office Region 7 (PRO-7).
Nagulat anya siya, “dahil wala pang isang linggo matapos kong makuha si Delfin Lee, naisyuhan na ako ng order. Hindi pa tapos ang report, na-relieve na ako rito.”
Una nang sinabi ni PNP Chief Alan Purisima na “stepping stone” sa promosyon at pagiging heneral ni Capa ang naturang pagsibak.
Reaksyon naman ni Capa: “Ang sa ‘kin lang po personally, kung talagang ako’y tatawagin [bibigyan] ng reward, ako naman po’y hinog na para ma-promote e.”
Kung gugustuhin anya ng PNP, may pwesto kung saan pwede na siyang ma-promote.
“Bilang pantatlo (na regional director) ‘yun pong pupuntahan ko ay maghihintay pa ako ng anim na buwan hanggang isang taon bago ma-promote.”
Maganda naman din anya ang kanyang performance sa mga nagdaang taon.
Pagkumpara pa nito, may mga kasabay siya sa PMA na nasa ‘pwesto’ na ngayon.
Suhestyon ni Capa kay Purisima: “sana pinalamig-lamig niya muna, pinalipas niya ng mga ilang linggo saka niya ako in-assign sa Cebu.”
Lalo’t may mga tanong at isyu pa aniya ukol sa pag-aresto.
Ngunit paglilinaw ni Capa, wala namang problema sa bagong destino. “Hindi naman demotion ‘yan. Medyo isang step pa.”
Samantala sinabi ni Capa na hiindi pa sila nagkakausap ni Purisima ukol dito.
Hindi rin anya siya binati ng PNP Chief nang mahuli nila si Lee na nahaharap sa syndicated estafa.
The post Hepe ng task force na nakahuli kay Lee, sinibak appeared first on Remate.