NAGBIGTI sa loob ng selda ang isang inmate ng Lucban Municipal Police Station sa Quezon kaninang umaga, Agosto 29.
Ayon kay PO1 Myla Nocum, alas-3:55 ng madaling-araw habang nagsasagawa ng inspeksiyon sa lock up jail nang mapansin ang nakabigting katawan ng inmate na si Efren Ludovice Lotino, 53.
Agad niyang ginising ang mga kapwa inmate nito upang pagtulungang tanggalin sa pagkakabigti si Lotino na gumamit ng tela na ikinabit niya sa rehas na bintana upang magbigti. Nadala pa sa MMG Hospital ang biktima pero idineklarang dead-on-arrival ng mga doktor.
Sinabi pa ni PO1 Nocum na nakita pa niyang buhay ang biktima alas-3:30 ng madaling-araw at wala naman siyang napunang kakaibang kinikilos ito.
Nakapkap naman sa bulsa ng biktima ang suicidal note nito na isinulat sa papel na parilya ng isang pakete ng sigarilyo .
Naniniwala naman ang pulisya na walang foul play na naganap sa insidente pero isasailalim pa rin ito sa awtopsiya upang makatiyak.
The post Inmate sa Quezon nagbigti sa karsel appeared first on Remate.