“LILINISIN natin ang kotong cops, kidnapping, extortion ,hoodlum in uniform sa lungsod ng Maynila.”
Ito ang tiniyak ni dating Pangulo at bagong upong Mayor Joseph Estrada sa kanyang kauna-unahang press conference matapos ang kanyang panunumpa sa harap ni dating Senador Juan Ponce-Enrile.
Sinabi ng alkalde na inatasan niya na ang bagong itinalaga at uupong district director ng Manila Police District na si Senior Supt. Isagani Genabe ng 100 days upang maituwid ang hanay ng kapulisan kung saan laganap ang baluktot na sistema.
Ayon pa kay Estrada, hindi magkakaroon ng balasahan sa 11 istasyon o himpilan ng MPD subalit tinaningan niya ang 11 commanders na ayusin ang kanilang mga nasasakupan sa loob lamang ng 15 days.
Kapag hindi, aniya, nila nagawa ang babala ay maaari silang mag-resign o mailipat ng puwesto.
Itinalaga rin ng alkalde bilang bagong City Administrator si Simon Garcia, Secretary to the Mayor naman si Atty. Edward Serabio, Liberty Toledo bilang Treasurer, City legal officer naman si Atty. Jay Flaminiano, Deputy Chief of Police si Sr.Supt. Gilbert Cruz.
Ayon pa kay Estrada, sa kanyang panunungkulan bilang alkalde sa lungsod ay magiging transparent ito sa lahat ng mga transaksyon sa publiko sa pamamagitan ng media.
Sinabi rin nito na prayoridad nito ang peace and order dahil walang uunlad na bansa kapag walang kapayapaan.
Kaugnay nito, nanumpa rin si re-elect Vice Mayor Isko Moreno sa harap ni Acting Senate Pres. Jinggoy Estrada gayundin ang mga konsehal na nagwagi sa ibat ibang distrito na ginanap sa session hall.
Dumalo naman sa oathtaking ceremony sina Vice President Jejomar Binay, dating Manila Vice Mayor Danny Lacuna, dating Senate President Ernesto Maceda, dating House Speaker Jose De Venecia at pamilya ni Erap sa pangunguna ng kanyang anak na si senator-elect JV Ejercito.
The post Erap ganap nang mayor, nagtalaga ng bagong opisyal appeared first on Remate.
